Турската амбасада во Скопје денес го одбележа Светскиот ден на турското кафе, ден посветен на една од најпрепознатливите културни традиции во регионот. Настанот, исполнет со мирис на свежо кафе и автентични детали од турската традиција, потсети зошто овој ритуал е многу повеќе од пијалок.

Историјата на турското кафе започнува во 1543 година, кога гувернерот на Јемен му подарил кафе на османлискиот султан- приказна што ќе го обликува секојдневниот живот на империјата и пошироко. Со векови, турското кафе станува симбол на гостопримство, социјален ритуал и уметност на подготовка што бара трпение, внимание и умешност. Во 2013 година, УНЕСКО го впиша во својата листа на нематеријално културно наследство, со што 5 декември официјално стана Светски ден на турското кафе.

На денешниот настан, турскиот амбасадор во Северна Македонија, Фатих Улусој, го истакна значењето на зачувувањето на традициите што со векови го обликуваат социјалниот живот во Балканскиот регион. Тој нагласи дека турското кафе не е само дел од културното наследство, туку и платформа за унапредување на соработката меѓу Туркије и земјите од Балканот, од развој на заеднички проекти, до посилна мултилатерална соработка.

Во своето обраќање, амбасадорот Улусој се осврна и на актуелната надворешна политика на Туркије за 2025 година, истакнувајќи ги економските и политичките предизвици со кои се соочува регионот. Тој ја потенцираше континуираната поддршка на Анкара за палестинската кауза, како и дипломатските напори за посредување во мировните процеси на Блискиот Исток.

Амбасадорот потсети и на последните интензивни дипломатски активности, меѓу кои посетата на министерот за надворешни работи Хакан Фидан на Вашингтон и состанокот со американскиот претседател Доналд Трамп, како и средбите со високите американски претставници. Со тоа, Туркије ја зацврстува својата улога како значаен меѓународен фактор и партнер во стабилизирачките процеси. Улусој ја нагласи и важноста на Туркије во НАТО, како земја која активно учествува во развојот на одбранбените политики и капацитети на Алијансата.