Американскиот претприемач Елон Маск објави на социјалната мрежа X дека неговата компанија xAИ развива своја онлајн енциклопедија наречена „Грокипедија“, со која планира да се натпреварува со Википедија.

Маск тврди дека новата платформа ќе претставува „големо подобрување“ во однос на Википедија, која тој постојано ја критикуваше како пристрасна.

Идната Грокипедија ќе се потпира на четботот Грок, кој, според Маск, е способен да ја анализира содржината на страниците, да препознава вистини, полувистини и неточни информации, а потоа да ги корегира со додавање на „недостасувачки контекст“.

Маск не прецизираше кога би можела да биде лансирана Грокипедија, но се очекува да привлече корисници кои ја делат неговата критика за Википедија и нејзиниот модел на финансирање преку донации.

Основачот на Википедија, Џими Велс, вели дека неговата платформа е посветена на точноста на информациите и предупредува дека мрежата X на Маск се соочува со сериозни обвинувања за ширење дезинформации.

Википедија е седмата најпосетувана веб-страница во светот и се потпира на работата на стотици илјади волонтери, но Маск се надева дека ќе ја промени состојбата на пазарот.