Вицепремиерот и министер за транспорт Александар Николоски во Подгорица, главниот град на Црна Гора, на средби со црногорскиот премиер Милојко Спајиќ, вицепремиерот за европски и надоврешни работи, Филип Ивановиќ, како и со министерот за транспорт, Радош Зечевиќ, разговарал за почнување редовни летови помеѓу Скопје и Подгорица, како и за поврзување на Македонија со црногорското пристаниште Бар.

„Разговаравме за поврзувањето. Веќе почнавме да го градиме автопатот Скопје-Блаце, кој што значи отворање на Македонија кон трето пристаниште- тоа е отворање кон пристаништето Бар, покрај пристаништето Солун, кон кое што имаме и автопатска и железничка конекција и покрај пристаништето Драч, каде што во моментот градиме и автопатска и железничка конекција. Исто така, со изградбата на автопатот од Скопје до Блаце зборуваме и за поврзување со пристаништето Бар“, објасни Николоски во обраќањето до јавноста.

Тој појаснува и дека се зборувало за авионско поврзување на двата главни града.

„Исто така, зборувавме и за авионското поврзување и очекувам во многу кратко време да се потпише договор којшто ќе значи директен лет помеѓу Скопје и Подгорица, со што ќе имаме уште еден главен град со којшто сме поврзани. Тоа многу ќе помогне за развојот на туризмот, но исто така и за развојот на бизнисот и конекцијата помеѓу двете држави. Аеродромите и во Скопје и во Подгорица растат и ова е добар начин да продолжиме да соработуваме и да продолжат да растат двата аеродроми“, вели македонскиот вицепремиер и министер за транспорт.

Николоски разговарал и за соработка на економски план.

„Зборувавме за заеднички настап пред европските фондови и пред европските банки во делот на финансирањето, пред сè во делот на интелигентни транспортни системи и поврзување на коридорите, а зборувавме и за соработката помеѓу двете држави во делот на политиката и економијата“, вели вицепремиерот и министер за транспорт.