Qeveritë e Malit, Burkina Fasos dhe Nigerit thonë se të tre vendet po tërhiqen nga Gjykata Ndërkombëtare Penale (GjNP), duke akuzuar tribunën globale për, siç shprehen ata, drejtësi selektive.

GjNP-ja, me seli në Hagë, është tribunali i përhershëm global për krime lufte, krime kundër njerëzimit dhe gjenocid.

Që prej grushtshteteve, udhëheqësit ushtarakë të këtyre tri vendeve janë shkëputur nga partnerët afatgjatë, përfshirë Perëndimin dhe bllokun rajonal të Afrikës Perëndimore.

“Mjet neokolonial”

Ata kanë krijuar aleanca të reja, kryesisht me Rusinë, presidenti i së cilës, Vlladimir Putin, përballet me një urdhër arresti nga GjNP-ja për luftën e Rusisë në Ukrainë.

Në një deklaratë të përbashkët të hënën mbrëma, ku njoftuan tërheqjen, të tre vendet thanë se GjNP-ja është shndërruar në “instrument të shtypjes neokoloniale në duart e imperializmit”, pa dhënë sqarime të mëtejshme.

Shtetet thanë gjithashtu se po kërkojnë më shumë “sovranitet” dhe lanë të kuptohet për një mundësi lokale si alternativë ndaj gjykatës.

Procesi i tërheqjes nga GjNP-ja zgjat të paktën një vit për t’u finalizuar.

Më herët këtë vit, edhe Hungaria njoftoi tërheqjen e saj.