Xhamia në qytetin Hultsfred në jug të Suedisë u shkatërrua nga një zjarr që shpërtheu vonë të hënën, e policia dyshon se zjarri është i qëllimshëm, njoftuan autoritetet lokale.
Zjarri shpërtheu vonë të hënën dhe shpejt përfshiu ndërtesën, e cila më parë kishte qenë kishë para se të shndërrohej në xhami, publikoi "Swedish Herald".
"Ne nuk e dimë si ka nisur zjarri, por ndërtesa është djegur", tha Michael Hesselgard nga shërbimi i shpëtimit.
Nuk është raportuar për të lënduar, por objekti i kultit është shkatërruar.
"Ndërtesa do të shkatërrohet plotësisht. Nuk do të jetë e mundur të përdoret për asgjë", shtoi Hesselgard.
Ekipet e shpëtimit qëndruan në vend deri në mëngjes për ta shuar plotësisht zjarrin, pas së cilës policia e rrethoi zonën për t’i filluar hetimet.
Zëdhënësi i policisë, Patric Fors, konfirmoi se rasti po hetohet si dyshim për zjarrvënie të qëllimshme.
"Klasifikimi është vendosur sepse nuk e dimë pse ka filluar të digjet", tha ai.
