Унгарија и Србија се согласија да ги забрзаат подготвителните работи за изградба на нафтовод меѓу двете земји, со цел зајакнување на безбедноста на снабдувањето и поголема енергетска стабилност во регионот, изјави унгарскиот министер за надворешни работи и трговија Петер Сијарто.
По средбата со српската министерка за енергетика Дубравка Ѓедовиќ-Хандановиќ во Вашингтон, тој рече дека штом унгарската компанија МОЛ го финализира купувањето на Српската нафтена индустрија (НИС), нафтените пазари на Словачка, Унгарија и Србија ќе работат во хармонија.
„Таквата координација на трите земји без излез на море дополнително ќе го зајакне отпорот кон политичката уцена, вклучително и притисокот од Украина“, посочи Сијарто.
Тој исто така нагласи дека Будимпешта ќе му даде целосна поддршка на МОЛ со цел успешно да се заврши процесот на преземање.
Сијарто нагласи дека новата транспортна рута значително ќе ја подобри безбедноста на снабдувањето со нафта и дека целта е што побрзо да се обезбеди стабилно и сигурно снабдување за двете земји преку забрзана подготвителна работа.
Како што изјави тој, проектот не е важен само за Унгарија и Србија, туку и за поширокиот централноевропски регион, бидејќи придонесува за подобра интеграција и поголема енергетска безбедност.
Средбата меѓу Сијарто и Ѓедовиќ-Хандановиќ се одржа во рамките на меѓународната конференција за енергетска соработка меѓу САД и земјите од Источна Европа.
Унгарскиот министер, исто така, најави дека за време на престојот во САД ќе ја информира администрацијата на претседателот Доналд Трамп за, како што изјави, обидите за политички притисок од Украина што доведоа до блокада на испораките на руска нафта преку нафтоводот „Дружба“.
Испораките на руска нафта до Унгарија и Словачка преку нафтоводот Дружба се прекинати од 27 јануари, кога Киев објави дека руски напад со беспилотни летала ја погодил опремата на цевководот во западна Украина.
Будимпешта и Братислава ја обвинуваат Украина за прекинот на снабдувањето, додека Киев вели дека работи на поправка на цевководот и дека Русија е виновна за прекинот.
