Унгарскиот премиер Виктор Орбан испрати отворено писмо до украинскиот претседател Володимир Зеленски, упатувајќи низа обвинувања против Киев и повикувајќи на промена во она што тој го нарече „антиунгарска политика“.
Во писмото, Орбан вели дека Зеленски „не можел да го прифати ставот на суверената унгарска влада и унгарскиот народ“ во врска со војната меѓу Русија и Украина веќе четири години.
„Четири години работевте на принудување на Унгарија во војна меѓу вашата земја и Русија“, рече тој на социјалната мрежа на американската компанија X, истакнувајќи дека Украина добила поддршка од Брисел за овој напор во текот на изминатите четири години, а тие ја придобиле и унгарската опозиција.
Унгарскиот премиер понатаму изјави дека, според него, Украина, институциите на Европската унија и унгарската опозиција преземаат координирани чекори за да донесат на власт влада во Унгарија која би била пријателски настроена кон Украина.
Тој посебно се осврна на енергетската безбедност, истакнувајќи дека нафтоводот „Дружба“, кој, како што изјави, е клучен за снабдувањето со енергија на Унгарија, е затворен во последните денови. Орбан тврди дека ваквите потези се спротивни на интересите на Унгарија и го загрозуваат безбедното и прифатливо снабдување со енергија на унгарските семејства.
„Затоа, ве повикувам да ја промените вашата антиунгарска политика“, рече тој.
„Ние Унгарците не сме одговорни за ситуацијата во која се наоѓа Украина. Сочувствуваме со украинскиот народ, но не сакаме да учествуваме во војната. Не сакаме да ги финансираме борбите и не сакаме да плаќаме повеќе за енергија“.
Тој ја повика Украина „веднаш повторно да го отвори нафтоводот „Дружба“ и да се воздржи од понатамошни напади врз енергетската безбедност на Унгарија“.
„Повеќе почит кон Унгарија“, додаде Орбан.
Испораките на руска нафта за Унгарија и Словачка преку нафтоводот „Дружба“ беа прекинати на 27 јануари, кога Киев соопшти дека рускиот напад со беспилотно летало ја погодил опремата на цевководот во западна Украина.
Будимпешта и Братислава ја обвинуваат Украина за прекин на снабдувањето, додека Киев вели дека работи на санирање на штетата и обновување на дотокот на нафта.
