Сопственикот на дискотеката Пулс, Дејан Јованов Деко е осомничен дека дал поткуп на службено лица во Министерството за економија да му обезбеди лиценца за работа на кабарето, соопшти Основното јавно обвинителство за гонење на организиран криминал и корупција.
Соопштението на ОЈОГОКК доаѓа на два дена пред истекот на притворот на Јованов во врска со обвинението за катастрофалниот пожар во дискотеката во кој загинаа 63 лица, со што се отвора можноста сопственикот на Пулс да остане во Истражниот затвор Скопје.
„Основното јавно обвинителство за гонење на организиран криминал и корупција донесе Наредба за спроведување истражна постапка против едно лице за кривично дело - Давање поткуп од член 358 став 1 од Кривичниот законик. Осомничениот дал поткуп на службено лице во Министерството за економија за да изврши службено дејствие што не смеел да го изврши, односно да му обезбеди лиценца за вршење угостителска дејност, без воопшто да поднесе барање за лиценца и во услови кога знаел дека неговиот објект не исполнувал законски услови“, соопшто ОЈО.
Од Обвинитеството додаваат дека поради опасност од бегство на осомничениот за ова кривично дело за кое е предвидена казна затвор од 1 до 10 години, како и фактот дека против него се води уште една кривична постапка за Тешки дела против општата сигурност, јавниот обвинител до Основниот кривичен суд Скопје доставил предлог за определување мерка притвор.
„Имено, осомничениот до сега беше обезбеден како обвинет во друга постапка. Но, со оглед на тоа што во однос на тоа дело истекуваат законските рокови за обезбедување, а јавниот обвинител од ОЈОГОКК продолжува да прибира докази во однос на дејствијата на поткуп, тој процени дека ризиците за обезбедување на осомничениот се големи и побара да му биде определена притворска мерка. Јавното обвинителство оценува дека притворот е апсолутно неопходна мерка за обезбедување на присуството на овој осомничен, ценејќи ги сите околности и основи“, соопшти Обвинителството.
Според ОЈОГОКК, службеното лице кое го примило поткупот веќе е обвинето и против него се води судска постапка за дејствија на примање поткуп.
„Доцна попладнево до Судот од Обвинителството е доставен предлог за определување нови мерки за обезбедување присуство против Дејан Јованов, кој веќе е во притвор за предметот поврзан со пожарот во Кочани. По него ќе се постапува во текот на утрешниот ден“, соопштија вечерва од Основниот кривичен суд Скопје
Газдата на Пулс требаше да излезе од притвор на 3 октомври, до кога му беше последното продолжување на притворот, со оглед на законската одредба дека може да ја издржува мерката најмногу една година од оцената на обвинителниот акт.
Јованов понуди 12 милиони денари или околу 200 илјади евра во недвижен имот како гаранција дека нема да побегне откако ќе излезе од притвор.
Тој е првообвинет во постапката во која се опфатени 35 лица како директни виновници за трагедијата во Кочани со правни дејствија од 2012 година до моментот на кобната ноќ, бидејќи не презеле соодветни дејствија да го спречат нелегалното работење на дискотеката Пулс и дека преку коруптивни дејства издавале фалсификувани лиценци и елаборати овој објект да продолжи да функционира.
