Швајцарските глечери во 2026 година изгубиле повеќе од 5% од волуменот на мраз поради интензивните топлотни бранови и зимата со малку снег, што довело до уште една година со екстремно топење, покажуваат новите податоци објавени денес.

Швајцарската мрежа за мониторинг на глечерите и Швајцарската комисија за набљудување на криосферата при Швајцарската академија на науките соопштија дека просечната дебелина на поединечните глечери се намалила за меѓу 2,5 и 4 метри, додека некои глечерски јазици во текот на летото изгубиле и до 10 метри мраз.

Само во изминатите пет години, вкупниот волумен на глечерите во Швајцарија се намалил за речиси 20%, покажува студијата.

Зимата 2025–2026 година беше меѓу „10 со најмалку снег“ откако започнале мерењата, додека секој месец од мај до септември донел сушни услови и најмалку еден топлотен бран.

Границата на замрзнување се задржала над 4.000 метри во рекордни 76 дена, што е повеќе од двојно над просекот. Во студијата се истакнува дека до септември не останал снег дури ни на надморска височина од 3.500 метри.

Неколку мали глечери веќе исчезнале за време на топлотниот бран во јуни, меѓу кои и глечерите Бела Тола и Грисфирен/Платалвафирн.

Од јули до септември глечерите изгубиле околу 2,2 билиони литри вода, што е повеќе од четири пати над годишната потрошувачка на вода за пиење на сите швајцарски домаќинства.

Истражувачите велат дека водата од топењето сè уште помага во ублажувањето на недостигот од вода во текот на летото, но тој придонес се намалува со натамошното намалување на површината на Швајцарија покриена со мраз.