Третата рунда индиректни американско-ирански разговори за нуклеарните и ракетните програми на Техеран заврши во Женева. Оман, кој посредува во разговорите, изјави дека е постигнат напредок и дека се разменети „позитивни и креативни идеи“.

Разговорите се одржаа во услови на зголемено американско воено присуство на Блискиот Исток.

Министерот за надворешни работи на Оман, Бадр ал-Бусаиди, објави дека е постигнат „значаен напредок“ во втората фаза од третата рунда мировни преговори меѓу САД и Иран.

„Ќе продолжиме наскоро по консултациите во Техеран и Вашингтон. Разговорите на техничко ниво ќе се одржат следната недела во Виена. Благодарен сум на сите вклучени за нивните напори: преговарачите, МААЕ и нашите домаќини, швајцарската влада“, напиша ал-Бусаиди на платформата X.

Иранскиот министер за надворешни работи, Абас Арагчи, во четвртокот навечер изјави дека Иран и САД направиле чекор поблиску до договор за одредени прашања и дека сериозноста од двете страни е очигледна.

Тој додаде дека двете страни се согласиле техничките тимови да започнат дискусии и прегледи во Виена почнувајќи од понеделник.

Тој, исто така, најави дека нова рунда разговори ќе се одржи за помалку од една недела.

И порталот Аксиос објави дека разговорите меѓу САД и Иран во Женева бил позитивни, повикувајќи се на неименуван американски функционер.

„Аксиос“ соопшти дека функционерот не дал веднаш дополнителни детали.

Извештајот дојде откако специјалниот претставник на претседателот Доналд Трамп, Стив Виткоф, и неговиот зет Џаред Кушнер, одржаа разговори со иранскиот министер за надворешни работи, Абас Арагчи, во Женева, со посредство на Оман.

Американската страна била „разочарана“ од ставот на Иран за време на утринската сесија, објави Аксиос, повикувајќи се на извор запознаен со разговорите.