Ministrja për Evropën dhe Punët e Jashtme e Shqipërisë, Elisa Spiropali, po zhvillon një vizitë zyrtare në Ukrainë.

Kryediplomatja e Shqipërisë është pritur në Kiev nga homologu i saj, Andrii Sybiha, ndërkohë ajo do të takohet edhe me zyrtarë të tjerë të vendit.

"Pritja në Kiev nga miku dhe ministri i Jashtëm i Ukrainës, Andrii Sybiha, ku u ndalëm pranë Murit të Kujtesës, për ta nderuar kujtimin e të rënëve për pavarësinë e Ukrainës, aty ku gjen forcën dhe frymëzimin, qëndresa e sotme e popullit ukrainas", ka shkruar në rrjetet sociale Spiropali.

Më herët gjatë ditës, ajo theksoi se do ta zhvillojë këtë vizitë zyrtare për të rikonfirmuar mbështetjen e Shqipërisë në krah të Ukrainës, sipas saj, "në kushtet e sulmeve masive që targetojnë infrastrukturën kritike dhe popullatën civile në mes të një dimri të egër".

Sipas Ministrisë për Evropën dhe Punët e Jashtme, Spiropali do të pritet në takim edhe nga presidenti i Ukrainës, Volodymyr Zelenskyy.