Претставници на сите директорати на Европската комисија и министри на земјите од Западен Балкан потврдија на денешниот состанок со превозниците дека решавањето на проблемот со професионалните возачи во патниот сообраќај е итно и ЕК закажа нов состанок за втората недела од февруари каде што ќе биде презентирано преодно решение.

„Поради итноста на ситуацијата и протестите што се случија, Европската комисија закажува состанок на работната група за втората недела од февруари, на кој ќе се даде предлог за привремено решение. Покрај државниот претставник, работната група ќе вклучува и по еден член што ќе го претставува превозникот, амбасадата во Брисел и Транспортната унија“, се наведува во соопштението на Меѓународната асоцијација за транспортен бизнис од Белград.

На денешниот онлајн состанок во Брисел, кој беше посветен на проблемите со кои се соочуваат возачите од овој регион по воведувањето на EEС системот во Европската Унија, беше кажано дека новата стратегија носи решение за кое се потребни неколку месеци за да се спроведе и дека е потребно побрзо да се реагира за да се најде прагматично решение кое не бара измени во актите, а дава решение за моменталната состојба со професионалните возачи.

Исто така, се нагласува дека Европската комисија им дала посебен контакт на земјите од Западен Балкан за понатамошна комуникација во врска со проблемот 90/180.

Меѓународната асоцијација за транспортен бизнис истакнува дека претставниците на Европската комисија побарале предлог да се испрати веднаш по состанокот.

На дневна основа, Европската комисија, како што додаваат, ќе има контакти со амбасадорите на земјите од Западен Балкан во Брисел со цел да даде повратни информации и дека поради важноста на темата, се очекува изјава за новинарите од Европската комисија.

„На состанокот, претставниците на Европската комисија ги споменаа протестите што беа организирани во претходната недела од страна на превозниците од Западен Балкан и го истакнаа големото негативно влијание врз европската економија. Претставниците на Србија и Босна и Херцеговина постојано повторуваа дека, доколку не се запрат апсењата и депортациите на професионалните возачи, во блиска иднина може да се очекува уште поголем бунт од страна на превозниците и повторување на блокадите“, се нагласува во соопштението.

Превозниците од Србија, Босна и Херцеговина, Црна Гора и Северна Македонија минатата недела ги блокираа премините за товарен сообраќај поради строгите правила на ЕУ за престој во Шенген зоната.