Кремљ во понеделник ги обвини молдавските власти дека спречиле стотици илјади Молдавци што живеат во Русија да гласаат на парламентарните избори, бидејќи само две избирачки места биле достапни за големата дијаспора.

„Од она што го гледаме и знаеме, можеме да потврдиме дека на стотици илјади Молдавци им била одземена можноста да гласаат во Руската Федерација, бидејќи само две избирачки места биле отворени за нив. Секако, тоа не било доволно и не им било дозволено на сите да гласаат“, рече портпаролот на Кремљ, Дмитриј Песков, објави новинската агенција РИА Новости.

Владејачката проевропска партија во Молдавија победи на парламентарните избори. Партијата за акција и солидарност (ПАС), на власт од 2021 година, освои 50,2 проценти од гласовите, а прорускиот Патриотски блок 24,2 проценти, според резултатите објавени од Централната изборна комисија на нејзината веб-страница.

Се предвидува дека ПАС ќе задржи апсолутно мнозинство со 55 од 101 места во парламентот.

На прашањето дали Москва ќе ги признае резултатите од изборите во поранешната советска република, Песков рече дека некои молдавски политичари посочиле нерегуларности.

„Прво, Молдавците веројатно треба сами да го решат ова. Колку што знаеме, некои политички сили го изразуваат своето несогласување. Тие зборуваат за можни прекршувања на изборните правила, рече Песков.

Руските владини претставници велат дека околу 500.000 Молдавци живеат во Русија.

Според молдавските власти, нешто повеќе од 4.000 Молдавци гласале во Русија, од кои околу две третини гласале за главниот проруски блок. Спротивно на тоа, повеќе од 38.000 Молдавци гласале во Германија на 36-те достапни гласачки места, повеќето од нив во поддршка на владејачката партија.