САД и нивните коалициски партнери ќе ја намалат својата воена мисија во Ирак, објави Пентагон.

„Во согласност со упатствата на претседателот и во согласност со Високата воена комисија на САД и Ирак и заедничката изјава издадена на 27 септември 2024 година, Соединетите Американски Држави и коалициските партнери ќе ја намалат својата воена мисија во Ирак“, изјави главниот портпарол на Пентагон, Шон Парнел.

Намалувањето одразува „комбиниран успех“ во борбата против ИСИС (Даеш) и пообемен напор за транзиција кон долгорочно безбедносно партнерство меѓу САД и Ирак, додаде Парнел.

„Ова партнерство ќе ја поддржи безбедноста на САД и Ирак и ќе ја зајакне способноста на Ирак да се стреми кон економски развој, да привлекува странски инвестиции и да игра водечка улога во регионот“, рече тој.

САД ќе продолжат со тесна координација со Багдад и коалициските партнери за да обезбедат одговорна и уредна транзиција.

САД моментално имаат околу 2.500 лица распоредени во клучните бази во Ирак.

САД и Ирак постигнаа договор за повлекување на коалициските сили предводени од САД од Ирак до крајот на 2026 година.