Претседателката на Европската комисија, Урсула фон дер Лајен, изјави дека верува во европската иднина на Косово по средбата со косовскиот премиер Албин Курти во Приштина.

Фон дер Лајен на прес-конференцијата во Владата на Косово рече дека Европската Унија (ЕУ) стои покрај Косово од 1999 година, поддржувајќи ги обновата, економскиот развој, реформите и изградбата на модерно и демократско Косово.

Осврнувајќи се на реакциите по пресудата против лидерите на ОВК, таа истакна дека одлуката треба да се гледа во контекст на индивидуалната одговорност. Но нагласи дека ништо и никој не може да ја препишува историјата на Косово и војната од 1998-1999 година.

„Едно е јасно, оваа пресуда се однесува на индивидуалната одговорност на обвинетите лица. Отпорот на Косово не беше предмет на судење и треба да го почитуваме сеќавањето на сите жртви, на сите заедници во Косово“, рече Фон дер Лајен.

Таа рече дека верува во европската иднина на Косово, додавајќи дека аспирацијата за членство во ЕУ треба да се претвори во конкретен напредок.

„Верувам во европската иднина на Косово и тоа јасно, бидејќи знам колку длабоко народот на Косово се чувствува како Европеец и тоа е темел врз кој треба да градиме. Наша задача е оваа аспирација за членство во Европа да ја претвориме во конкретен напредок“, додаде претседателката на ЕК.

Курти: Косово е доверлив партнер на Европската Унија

Косовскиот премиер Албин Курти рече дека Косово во последната деценија остварило еден од најбрзиот раст на демократските показатели во регионот. Тој рече дека Косово постигнало конкретен успех во борбата против корупцијата, зајакнувањето на владеењето на правото, заштитата на човековите права и слободи и унапредувањето на демократијата.

Курти рече дека напредокот на Косово ја направил земјата една од најбезбедните во Европа, додавајќи дека е постигнат значителен напредок во безбедноста и владеењето на правото на северот на Косово, каде што мнозинството од населението е од српска етничка припадност.

„Косово е доверлив партнер на Европската Унија. Ние сме 100 отсто усогласени со надворешната и безбедносната политика на ЕУ, вклучително и со сите санкции за Русија поради нејзината агресија врз Украина. Ние ги браниме вредностите на Договорот 2 за европско обединување, а поддршката на нашите граѓани за членство во ЕУ останува највисока во регионот, веднаш по Албанија“, истакна Курти.

Курти рече дека во декември ќе се навршат четири години откако Косово поднесе барање за членство во ЕУ, додавајќи дека очекуваат поддршка од Фон дер Лајен отворено да зборува за потребата Косово да добие статус на земја кандидат и да упати повик до Комисијата во врска со апликацијата на Косово.

Фон дер Лајен се сретна и со вршителот на должноста претседателка на Косово, Албулена Хаџиу.