Организацијата што ја поседува Формула 1 и владата на Руанда се согласија да ја одржат првата трка за Големата награда на Ф1 во Руанда по 2030 година, пишува АФП.
Два извори блиски до владата на Руанда посочија дека администрацијата на Руанда ќе објави информации за настанот, кој би бил првата трка за Големата награда на африканскиот континент уште од Гран При на Јужна Африка во 1993 година.
„Постигнат е договор за одржување на трката по 2030 година, изјави еден од изворите, опишувајќи ја веста како голем чекор напред за земјата.
Извор близок до Меѓународната автомобилска федерација (ФИА), која го управува спортот, но не е нејзин сопственик, спомена прес-конференција закажана за следната недела во Кигали, главниот град на источноафриканската нација.
„Со нетрпение го очекуваме Гран При на Формула 1 во Руанда, напиша министерот за спорт на Јужна Африка, Гејтон Мекензи, на платформата X.
„Тие работеа на оваа кандидатура подолго од Јужоафриканската Република и го заслужуваат тоа“, додаде тој, истакнувајќи дека двете земји се натпреваруваат да ја вратат Формула 1 во Африка.
Руанда е планинска земја во регионот на Големите езера во Африка, малку помала од Белгија, земјата што ја колонизираше од 1920-тите до добивањето независност во 1962 година.
Нејзината историја е обележана со геноцидот од 1994 година врз Тутсите, во кој 800.000 луѓе, претежно членови на таа заедница, но и умерени Хуту, ги загубија своите животи.
Оттогаш, под водство на претседателот Пол Кагаме, Руанда претрпе економска трансформација што е јасно видлива во главниот град Кигали.
Сепак, критичарите на Кагаме, кој беше реизбран за четврти мандат минатата година со 99,18 проценти од гласовите, го обвинуваат дека владее со земјата со железна тупаница и дека ги задушува сите противници.
Кагаме, исто така, одлучи да ја промовира својата земја преку спортот, а Руанда минатата година стана првата африканска земја што беше домаќин на Светското првенство во велосипедизам.
Кигали спонзорира неколку големи европски фудбалски клубови, ПСЖ, Атлетико Мадрид и Астон Вила, како и кошаркарската франшиза Лос Анџелес Клиперс (НБА), преку логото „Посетете ја Руанда“.
